زيارتي في الكريسمس للاس فيغاس، نيفادا 🎇🎄 - كيف شفتها بمنظوري!

Sunday, October 29, 2017

شلت كل التوقعات اللي في بالي والكلام اللي سمعته وقريته عن مدينة لاس فيغاس قبل ما أركب الطيارة عبر خطوط Delta في إجازة الكريسمس السابقة..
كنت حريصة إني أروح وأصنع إنطباعي الخاص عنها وأستمتع فيها بطريقتي وأشوف كل شيء فيها من منظوري الخاص فقط!
كانت إجازة الكريسمس جدًا طويلة فأخذنا منها ثلاث أيام لسياحة فندقية واللي صايرة مؤخرًا تايبي المفضل من السياحة << النزول في فنادق ,والاستكنان فيها والاستمتاع بخدماتها.. 💆‍♀
طبعًا فيغاس قائم اقتصادها على سياحة الفنادق، يعني كل فندق يقول الزين عندي بس تكفااا تعال، والأسعار جدًا جدًا منافسة << أو بمعنى صريح: رخيييييصة! 😍💵

أول ما أقلعت الطائرة من سياتل -مدينة الزمرد- كان المنظر العلوي من شباك الطيارة مرره يجيب العافية وتدريجيًا بدأ اللون الأخضر يختفي بمجرد ما قربنا من أراضي ولاية نيفادا 🌵 ما أذكر إني شفت مظاهر عمران إلا لمن صرنا فوق مدينة لاس فيغاس << مدري إذا فيه مدن غيرها في ولاية نيفادا والا لا 😅
لأنه طبيعتها صحراوية جدًا وجافة جدًا ومافيها لا بحر ولا بحيرة ولا نهر ولا حتى بترول! يعني مافيها شيء يأهل الناس إنهم يختارون السكن فيها عن غيرها من الولايات.. أذكر مرة كنت عند محطة الباص أنتظر الباص يجي وجلست جنبي عجوزة تسألني عن خططي للكريسمس ههههههههه عاد مدري هي وش تقصد يوم تسألني وأنا بحجابي، بس افترضت إنها كانت تسأل عن إجازة الكريسمس وقلت لها إني ممكن أسافر مع الهزبند لفيغاس.. وقامت عاد تسولف معايا عن تاريخ فيغاس وسمّت لي أول شخص تراهن مع أصحابه إنه يفتح كازينو في فيغاس وانه كل اللي حوله كاانوا يضحكون على فكرته إنه مررره واضح فشل مشروعه من البداية! كيف انها مدينة صغيرة وفاضية وماحد يزورها ومين بيجي الكازينو حقك ومن هالكلام.. وبالأخير نجح هالكازينو << أتوقع من طفش السكّان ما لقوا غيره ينبسطون فيه 😅 وبعد هالنجاح فتحت كازينوات كثيرة جنبه وأماكن للقمار وهالسوالف إلين اشتهرت هالمدينة وصار لها روادها وسياحها.. 🚎 وجا الباص وقطع علينا وكذا عاد والله كانت سواليف ثرية هههههههههههه المهم اللي باوصله من هالسالفة إنه المدينة مافيها شيء خارق للعادة، مجرد ما إنهم عمّروا جزء كبير منها وأبدعوا في إعمارها صارت مصدر جذب للسياح من كل مكان.. 🌃 << عاد لمن يكون الهزبند مهندس يصير يلفت نظري أكثر للفن العمراني وتفاصيله وهذا كان الدافع لاختيارنا لهالمدينة من الأساس 😍💫

قبل السفر اهتمينا نبحث في الفنادق ونختار أفضل الأفضل بالنسبة لنا، كمان كان يهمنا إن الفندق اللي بنسكنه يكون على مكان إستيراتيجي بوسط كل شيء نبغا نزوره خصوصًا إننا معتمدين في تنقلاتنا 100% على المشي فقط 👌 
استعنّا بتطبيق TripAdvisor و Yelp عشان نشوف الأتراكشنز والأنشطة اللي تستحق التجربة ودونّا عنها كل المعلومات اللي تخصها (موقعها، أوقات العمل، سعر التذاكر..إلخ) بحيث إنه كل يوم نسوي خطة حسب مودنا وقتها 😇✨
فكان عندنا تصور واضح لطريقة إقامتنا هناك ✈


لمن قاربت الطيارة على الهبوط وصرت أحاول أشوف معالم مدينة لاس فيغاس ولاحظت فيها جزء كبييييير مجرد بيوت على نفس الإرتفاع مصفصفه بشكل ممل 🐽 وبعديين لمن قربت الطيارة من المطار لمحت تمثال برج الحرية المصغر واممم كأني شفت أبو الهول ومباني كثيير تحممسس بشكل عام 😍 استانست لمن شفت انه المطار قريب من الأماكن اللي أبغاها

*صورة من الجوال للاس فيغاس من الأعلى*

*صورة من الجوال لمدرج مطار لاس فيغاس وقربه من معالم المدينة المهمة*

نزلنا المطار وكل شي كان حلو ومرتب ونظيف ولفت نظري بالمطار بكل جهة فيها مكاين القمار <<بغض النظر عن وضعها وحكمها الشرعي بس كانت أشكالها ولمباتها و ألوانها مسوية جو بالمكان 😂 حسيتني في تشكي تشيز مافيه فرق إلا أعمار اللي جالسين عليها..

كان معانا شنطة وحدة كاري اون فطلعنا على طول للمواقف وطلبنا أوبر، واحنا بالطريق عند المطار لفتني منظر الطيارات الخاصة كان أكبر عدد شفته بحياته لأن أكثر هالطيارات هي ملك لفنادق << مو أقول لكم التنافس بالفنادق مرره عنيف!
طبعًا مقارنة بمشوار المطار للفندق اللي أتعبني في لوس آنجلس كان هذا المشوار الاوبزت.. أبد.. حذفة حصى وانتم بالفندق! 😭💖

لاس فيغاس -اللي الناس يزورونها- هي عباره عن شارع الستريب، هو فرع من لاس فيغاس بوليفارد، شارع طوييييل عاليمين وعاليسار فنادق ومحلات ومطاعم ومولات أشكال وإضاءات ولافتات وإعلانات وكل شي ملفت وجميل صباحًا ومساءًا.. وحتى المطاعم والمقاهي المعروفة زي ستاربكس نلاقي إبداع في تصاميمها بطريقة مذهلة 🤑✨




كل فندق أومجموعة فنادق كانت تستوحي تصاميمها وكل شيء بحيث إنها تشكل مدينة معينة بكل معالمها.. يعني فيه مجموعة فنادق حول بعض مسوية ستايل نيويورك سيتي 🌃😍 هاذي المنطقة المباني فيها تتشكل على نفس طراز أبراج منهاتن وفيها تمثال الحرية ورصَة اللوح الإعلانية فيها تذكرك بالتايم سكوير وكل شي من هذا القبيل 🗽 ما تملّون من التمشي بينها 😍

<<< الرولكوستر اللي عاليسار كان عليها مددددح مرره حمسني! بس وقتها كان بررررد وحسيت ما يسوى علي يصفقني الهوا وأقعد مفلوزة عشان متعة لمدة دقيقة 😞 بس إذا عادي عندكم جربوها ههههههه أنا غير مسؤولة عن العواقب




<<< وصار عندنا أصدقاء من الليقوز في نيويورك لاس فيغاس

<<< كمان تعرفت أنا على ليقو زرقاء وجلسنا نتبادل أطراف الحديث*



كانت منطقة النيويورك وفنادق من أمتع الأماكن اللي رحناها خصوصًا إنه كان فيها فرع كبيييير لـM&M's مخمخت فيه بعننف!
وعلى إمتداد شارع الستريب في الجهة الثانية أثناء ما كنا نتمشى كمان لفت نظرنا مجموعة فنادق تعطيك طابع فينيسيا وروما في إيطاليا وفيها جولات بالقوارب مع أجواء راايقة..




أمااا هالمكاان هو الأجمل بالنسبة لي! 💘  هنا كل شي يحسسك إنك في باريس~
 وهذا الفندق إللي سكنّا فيه (فندق باريس لاس فيغاس) من حظنا وقتها إننا قدرنا قبل الرحلة بثلاثة شهور نحجز غرفة كلاسيكية تطل على برج إيفل لأن بعدها بوقت وجيز جدًا صارت سولد آوت.. مدري أسولف عن تصميم الفندق والمباني اللي حوله وإلا قوس النصر وبرج إيفل وإلا الغرفة الكلاسيكية نفسها!! 😭
لكن بأخليكم مع الصور اللي التقطتها في رحلتي خلال الصباح والمساء 💫 ..(وترا تقدرون تضغطون عليها إذا تبغونها تتكبر وتشوفونها بجودة أفضل!)




*اللي عاليسار هاذي بوابات الفندق اللي تدخل على اللوبي*



<<< لاحظوا البرج جزء منه برا الفندق وجزء داخل الفندق! كييييف داخل الفندق؟؟  بأوريكم الحين 😎

 بشكل عام ردهات الفنادق في لاس فيغاس تعتبر مزار وأتراكشن بحد ذاته، وتُفتح ردهات الفنادق أبوابها حتى لغير الساكنين فيها للاستمتاع بالجلسات والمطاعم والمقاهي (وبعد مكاين القمار والبارات.. وكل واحد وتوجهه 😛).. بالنسبة لي دخلت ردهات كثير فنادق بس أجمل من لوبي فندق باريس ما شفت!!  اللوبي مستغلين المساحات اللي فيه بطريقة خرافية! ومسوين المحلات اللي فيه بنفس طريقة محلات الشانز اليزيه 😍❣ كذا بس ودك تتمشين فيه وتتفرجين عالرايح والجاي << يعني صدق أنصح أي أحد يزور فيغاس إنه يجي يزور لوبي فندق باريس وياخذ له فرة 😉


*اووف ما لقيت صورة للجهة اللي داخله فيها رجول برج إيفل في اللوبي ههههههههههه، آسفة يللا معليش روحوا قوقلوها*


<< تخيلوا واحنا طالعين للمطار وبنطلب اوبر قالوا روحوا من البوابة الجنوبية غير اللي ندخل ونخرج منها بالعادة.. واحنا في طريقنا للبحث عن البوابة الجنوبية جتنا صدمة لمن اكتشفنا أماكن ثاانية امتداد للوبي 😲 مو هنا الصدمة! المكان الثاني كان يججنن أكثر وفيه مقاهي ومخابز تشمون ريحة الفطاير فريش من التنور 😭😭😭  المشكله اننا قاعدين نتفاجئ بالأماكن الجديدة هاذي واحنا نجرجر الشنطة وماسكين جوالاتنا نشوف الخرايط وندور هالأوبر 💔 بس يللا مو مشكلة مو متحسفة لأني انبسطت بالموجود 💟

صدققق كان أحلى قرار إتخذناه إننا نسكن في هالفندق، رغم جمال كل الفنادق اللي حوله بس حسيت هذا الأقرب لجوّنا وذائقتنا، كنت فعلًا أستمتع لو بس أجلس بالغرفة وأتأمل منظر برج إيفل بالليل مع أنغام أول نافورة راقصة في العالم التابعة لفندق بلاجيو المقابل لغرفتي 💘 .. أخليكم مع صور الغرفة اللي فطنت أصورها ليلة السفر ورتبتها لكم ترتيب مشي حالك 😅



<< الكنبة والصوفا كانت بهالشكل لمن دخلنا الغرفة، بس طبعًا شقلبتها وخليت الجلسة تطل على برج إيفل 😍


<<< لاحظوا المسبح فااااضي لأنه شتاء وهاذي أهم نقطة لازم تنحط في الحسبان أثناء زيارة لاس فيغاس (اختيار موسم التستر) 😅

بالنسبة لستايل الغرفة كان من اسمها.. كلاسيكي فرنسي فخم بس ناعم ومريح .. مدري كيف! بس أخذني لحقبة زمنية جميلة بكل التفاصيل اللي بالغرفة 💓  << طبعًا هالكلام مو بس لغرفة النوم؛ حتى دورة المياة كانت تعطي نفففس الشعور الفخم المريح بكل نقطة ممكن تطيح عينكم عليها~


<<< حمام بيتي المستقبلي بأحط فيه ورق جدران كذا 😢💘 لاحد يقلد لو سمحتم 



<< عاد أنا يوم شفت الوضع كذا دلع قلت يبيلها باث بومبز، والحمدلله لقيت فرع لش قريب من الفندق 🛀 حلووو للاستكنان خصوصًا بعد مشي طوويل 😴

عاد صراحة، اللي ما جرب المشي على أرصفة هالشارع والدخول في ردهات الفنادق والخروج من الثانية فهو فوّت على نفسه الكثيييررر من المتعة والله.. المدينة جدًا حيوية بالليل بالذات مع إضاءاتها وأجواءها الصاخبة عشان كذا ما فوتت إني اركب العجلة بالليل وأستمتع بمشاهدة المدينة من الأعلى! 🎡 ومن حسن حظنا وقتها ما كان فيه سرى، فدخلنا على طول في الكبسولة وكنا لوحدنا فيها فانبسطنا مررره واستمتعنا بالمشاهدة من كل الجهات بدون ما يكون فيه أحد محتكر جهة واحنا نستحي نقرب منهم 😟



<< طبعًا يفضل يكون عندك حجز مسبق عشان تدخلين على طول بدون ما توقفين عند التذاكر~
فبطبيعة الحال حجزنا كان بالليل على الرغم من إنه أغلى شويتين من سعر التذكرة في الصباح.. بس عارفين إنه جمال لاس فيغاس بأنوارها بالليل 😍🏙



ومن هنا محطة الإنطلاق 💃


<< طبعًا لاااازززززم سيلفي متحمس كذا مع هالفيوو! duh 😏

<< وهذا الجزء الآخر من مدينة لاس فيغاس (ما وراء الستريب ستريت) 👀 المهم لاحظوا الأنوار اللي في السماء.. هاذي مو نجوم ترا 😅 هاذي الطيارات بتهبط في المطار.. الرحلات ورا بعض ورا بعض 👏

بشكل عام شفت لاس فيغاس مدينة جميلة جدًا (طبعًا أقصد هالشارع بس).. منطقة متنوعة وجميلة وتصلح للعائلات، وفيه فنادق كثير يفضلونها العوائل اللي عندهم أطفال يكون مافيها مكاين قمار في اللوبي، يعني فيه خيارات لكل الرغبات والأذواق، أبدًا أبدًا مو زي ماهو متصورينه الكثير..
طبعًا لاس فيغاس تشتهر بالمطاعم الفاخرة وفيها كثير من فئة الخمس نجوم وفيها أشهر الشيفز والطباخين عالميًا، وبعضهم يجون في المواسم لمطاعم معينة ويصير حجز المطاعم يتفلل من قبل الموعد بشهووور! << هالكلام للي تهمهم جزئية المطاعم في سياحتهم بيستانسون هنا مررره 😍😋👌..
أمّا بالنسبة لي فأنا آكل عشان أعيش -وليس العكس- فمتى ما كنت أمشي وصرصر بطني تلفتّ يمين ويسار أو فتحت تطبيق فورسكوير شفت أقرب مطعم وأخذت منه وانبسطت وكذا 😘


<< يعني بالله وش أحلى.. إنك ترجعين البيت وتلبسين بجامتك وتتربعين عالكنبة وتاكلين من بوبايز وتقرمشين في الدجاج براحتك وتقعدون تسولفون عن الحياة مع هالمنظر وموسيقى النافورة الراقصة .. والا تقعدين مترززة في مطعم فايف ستارز وتتكلمين وشوشوشوش وانتي ميبسة ظهرك ومسوية برستيج وبالاخير تجيك لقمه  مزينينها في صحن ب400$؟ 😒

فاللي صدق أعجبني هنا إنه فيه خيارات لكل شي، حتى لو كانتأهدافكم تسوق بتلاقون هنا مولين آوت ليت وفيه كمان بتلاقي فيه مول كبيير على نفس الستريب ستريت ومولات صغيرة موزعة تحت الفنادق، وفيه كمان مجمع لديزاينر هاي إند براندز وفيه محلات متفرقة في الشوارع الفرعية وفيه محلات لوكال ومشغولات يدوية.. اللي ودكم بس قولوا ايش تبغون 💸
ولو بخاطكم بس تتمشون بالمكان راح تشوفون عروض بالشوارع -بالذات انه وقتها كان قبل الكريسمس ومدهريين بكل مكان- وفيه عروض فردية بالشارع وكثير يلبسون ملابس تنكرية عشان تتصورون معاهم، برضو بتلاقون كثير فجأة يطبون يسألون انتي من وين وييسولفون معاكم عشان ينشبون لكم بالاخير تشترون تذاكر عروض ومسارح لأنه فيغاس فيها عروض مسرحية وسيرك وخفة يد وأشياء كثييره مره، لو بخاطركم تحضرون شي زي كذا ابحثوا قبل وقت زيارتكم عن العروض المتاحة واحجزوا تذاكرها من بدري 👌
اممم وش كمان أبغا أقول لكم 👶
اييييييييييه ايييه احذذذذروا احذروا تاخذون بطاقات من الناس اللي يوزعونها بالشارع! مررررره ما انصحكم حتى لو لزق بوجهكم لا تجاملون وتاخذونها 💩 حتى الأمريكان نفسهم يرمونها وبتلاقونها عالأرض بكل مكان.. فيجب توخي الحذر لأنها تحتوي على أشياء غير أخلاقية 🔪


ووو بس والله.. أخليكم مع صور متنوعة من زيارتي.. مع الشكر للهزبند اللي كان مبتلش بالتصوير وانا قاعدة أتمشى وأستمتع بالحياة 👩‍❤‍👨



<< أحب الشتاء وأحب الستر 😂👌❤

<<< هذا المول اسمه فاشن شو (Fashion Show Mall) كبييررر فيه أكثر من 200 محل .. بس رحت يدوب كم محل فيه وطلعت ما لفيته كله لأن ورايا مشي مشي 💪



<<< مرينا داينر محلّي كان قريب مننا وتعشينا فيه ومرره طلع أكلهم في الراس.. لأ، في الراااااااصصصصصص 👅









<<< فندق سيزر بالاس 😍 اللي يتابعون فود نيتوورك بيعرفونه 👍




هنا باختصااااار بأكتب بعض النقاط المهمة بشكل عام لأي أحد حاب يزور لاس فيغاس 💫

  • شارع الستريب (الجزء الجنوبي من لاس فيغاس بوليفارد) مررررررررررررره كبير لا تتوقعون إنكم تقدرون تغطونه كله بيوم واحد مشي عالأقدام .. وبنفس الوقت لا تحطون له أكثر من ثلاث أيام مرره كثير عليه
  • فندق باريس مكانه بالوسط بالضبط، يوم تمشينا فيه بالجهة الشرقية من الفندق ويوم ثاني مترنا الجهة الغربية وقدرنا نستمتع في كل جزء منها وحللناه كويس 👌 فإذا عجبكم فندق معين احرصوا انه يكون بالوسط حول باريس وبلاجيو
  • بالنسبة للفنادق في فيغاس بشكل عام مافيها آلات قهوة أو كوفي بار، لكن بامكانكم تضيفون كوفي بار في غرفتك برسوم إضافية << معلومة مهمة لبتوع قهوة الصباح.. وإلا إذا ودكم بعد جيبوا معاكم العزبة والحياة حلوة 🍃
  • لا تحطون في بالكم إنه السعر اللي في بوكنق هو السعر النهائي، لازم تحطون في الحسبان سعر الضريبة + قيمة استخدام مرافق المنتجع << حتى لو ما كنتم بتستخدمونها زي المسبح في الشتاء مثلا 😓
  • على الرغم من إن الشتاء في لاس فيغاس ما يعتبر قارس إلا إنه جاااف جدًا فأنصحكم بالكريمات من العيار الثقيل بالذات إذا خرجتم برا بتتشققون مع البرد
  • فيه كثير تطبيقات ممكن تستعينون فيها برحلتكم لكن أفضلها كان TripAdvisor هو اللي من خلاله تعرفنا على النشاطات والأماكن الحلوة في فيغاس.. وإذا ودكم بتطبيق يساعدكم باختيار المطاعم فأفضلها هو FourSquare 👌 رهيبين في كل مدن العالم حتى بالسعودية 😋
  • أغلب الفنادق تحتها مجموعة محلات ومطاعم ومقاهي، وبعض الفنادق فيها مولات تحت.. اكتشفوا اللي حولكم 🔍

وبالختام، بنظري لاس فيغاس مدينة جمييييييلة، وممكن أكرر الزيارة كذا مره فقط لو كان في فصل الشتاء أو في إجازة الكريسمس يكون عدد السياح أقل من المواسم الثانية وأجواء الكريسمس في المدينة بشكل عام ممتعة وتعطي فايبز وغير انه الجو ما يساعد على الثانيين على التفصخ 😅👙.. وسواء في هالمدينة أو غيرها موجود الصالح والطالح والإنسان العاقل يعرف يختار الأماكن اللي تليق فيه ويعرف كيف يتجنب السيء منها والمثير للشبهات ويستمتع عادي بشكل طبيعي..  
ووو بسس حبيت أنقل لكم تجربتي في هالرحلة كيف كانت وأنقل لكم بعض التفاصيل الجميلة اللي ما يعرفها كثير عن مدينة الأنوار أتمنى تكونون خشيتم جو معايا وكذا 😍✨


وفتككوا بعاافية 🎇🌠

____________________

🎀

          
  •            
  •            
  •            
  •            
  •       


7 comments:

  1. حبيبتي روان توي اكتشفت مدونتك .. جميييلة والمعلومات الي تعطيها جدا قيمة .. وطرحك ممتع والصور جميلة استمري 😍😍

    ReplyDelete
    Replies
    1. أهلًا فيك وسهلًا 😍
      مرره فرحني إنها عجبتك ✨💘 شكرًا على إطراءك

      Delete
  2. اكتشفت اشياء جديدة مازرتها في مدونتك بس بالمرات الجايه ان شاء الله وعلى ذكر تاريخ فيقاس قالوا لنا لما رحت برضوا انهم فكروا كيف ممكن يستثمرون ب هالارض القاحله وفتحوا فيها الكازينوهات والقمار عشان يجذبون السياح فيها وهذي اعتقد القصه الشهيره لها

    ReplyDelete
    Replies
    1. وهذا أجمل ما فيها 😍 كل مره تكتشفين شي جديد 💓
      وفعلًا بالنسبة لقصة الاستثمار في لاس فيغاس، سمحوا فيها أشياء قد تكون ممنوعة في بعض الولايات والمدن زي الشرب في الشوارع مسموح فيها

      Delete
  3. أنا فيني عن مدونتك من زمان؟
    أسلوبك روووعة ما شاء الله و مواضيعك تجنن
    بالنسبة لفيقاس ما سبق وزرتها بسبب الكلام اللي سمعته عنها بس بعد تدوينتك أضفتها لقائمتي
    شكرًا لك روان و أتمنى تستمري بطرحك اللطيف

    ReplyDelete
    Replies
    1. يسسعدك ربي مرره شكرًا 💫
      فعلًا بسبب الكلام كنت متخوفه من المدينة بس زي ما ذكرت في البداية اني كان ودي أغير جو وأكمل قائمتي في الفنادق اللي أزورها.. وأسعار الفنادق في فيقاس مرره تحممس!
      بالنسبة للمدينة فعلًا كانت ممذكلة بالنسبة لي حسيتها تستحق تقرير كاامل 😻

      Delete
  4. الله استمتعت بموضوعك جدا حلو تقرير الزيارة مررررة حلوة وصفك للمدينة حلو

    ReplyDelete

Top