استيعاب متأخر لموسم الخريف - التغيير 🍁

Saturday, October 14, 2017

باب شقتي محتفل بالخريف من السنة اللي فاتت! 😂 
حب كبير لهذا الموسم 💛



طول عمري وأنا ساكنة الرياض أعرف من مواسم السنة: موسم الشتاء والبرد والمخيمات، وبعده فترة يزين الجو فيها وغالبًا هالفترة يقعدون يقولون لا تشيلون ملابس الشتاء ترا بيجي (بياع الخبل عباته) يعني لا تنخدع بدفا الجو ترا ممكن يباغتك البرد فجأة من حيث لا تحتسب.. وبعدين فجأة يجي الصيف، أذكر موسم الصيف يطوول مرره! يعني لدرجة إنه طول السنة صيف وفيها شويا شتاء.. 
رغم ذلك كنت أحب جو الرياض اللي يقولون عنه أهل المناطق الساحليه جاف يشقق البشرة.. كان يجيني شعور إنهم برمائيين عشان كذا يتحولون شابورة أول ما ينزلون مطار الملك خالد..! ممكن! 🐸💛
أعرف إنه فيه فترة من الفترات يسوون مهرجان الزهور بالرياض، فأستوعب إنه اووه اوكي مهرجان الزهور = زهور ملونة متفتحة = إحنا في فصل الربيع!! 🌷
وكمان أعرف موسم يسمونه موسم الأمراض ههههههههههههههههههه هذا والله أعلم إنه هو موسم الخريف 😂😂😂💛
صدق صدق لفترة طويلة ما أعرف إلا الصيف والشتاء حرفيًا، وكان يدهشني على نهاية سبتمبر لمن أفتح اليوتيوب وأشوف اليوتيوبرز يتكلمون عن موسم الخريف وعن أجواء الخريف وكيف إنه له طابع مختلف سواء بالملابس أو نوعية الأكل أو حتى ديكورات البيت!
ااخ كانت فكرة تغيير ديكورات البيت الموسمية تسحرني صدق! مرره أحب كيف إنه بكل موسم أو مناسبة يصير فيه تغييرات بسيطة بالبيت تغير الأجواء وتكسر الرتابة والجمود إللي في البيت طوال السنة سواء تغيير ألوان الخداديات والثرو أو وضع تحف جديدة ومن هالشغلات الغير مكلفة.. وفعلًا أنا سعيدة كيف إنه دخل هذا المفهوم في بيوتنا وصرنا نسوي بعض التغييرات في شهر رمضان المبارك 🌙 مرره جميل الإحساس ومتأكدة إن أكثرنا صار فيه شعور كبير بالسعادة والحماس من نهاية شعبان لمن نبدأ نغيربعض المواعين والديكورات اللي نستقبل فيها رمضان <<وأنا ما أشوف هالموضوع له علاقة بالدين لأننا مو قاعدين نتعبد ربي بهالأمور << عشان محد يطمر علي الحين 😅
المهم.. كنت من قلبببب أستمتع بسوالف تغير المواسم عندهم، ولو إني كنت في بعض الأحيان أحسهم يبالغون ههههههههه << مومستوعبه إنه فيه شي صدق اسمه خريف وربيع إلين ما جيت أمريكا!
جيت في صيف 2016.. كان الجو حار إلى حد كبير ومشمس أغلب الأيام وكان الشجر والخَضار على مد بصري في سياتل، وعلى نهاية سبتمبر مع دخول الخريف صرت ألاحظ إن الجو صار يميل على البرودة وموجات الحر اللي كانت تجي في بعض أيام الصيف جات بدالها موجات البرد.. يعني غالبًا يكون الجو بارد بدرجة مقبولة وفجأة بنص اليوم يقلب زمهرير بدون ما تكونين مستعدة ❄ والأشجار الخضراء تبدأ ألوان أوراقها تتحول للأحمر والقرمزي بالتدريج على مدار هالثلاث شهور إلين ما توصل اللون البرتقالي والأصفر وتطيح.. ويمتلي الرصيف بالورق الجاف!


أما بالنسبة لنظام السوبرماركتات هنا، فهي تعرض الفواكه الموسمية في الواجهة وعلى الأرفف بشكل مرره جذاب يعني حاليًا أغلب المحلات التجارية فيها أنواع وأشكال وأحجام متعددة من القرع والتفاح! 🍏🍎 أشكال أعرفها وأشكال كأنها ألعاب -حرفيًا من غرابتها- 🌝
وبالتزامن مع موسم القرع حتى الشركات الغذائية تتنافس بشكل كبير في الإبتكار بصنع نكهات لذيذة من منتجاتها يدخل القرع فيها سواء حلويات أو فطاير وكيك أو قهوة وكل شيء تتوقعونه حتى من الحلويات اللي متعودين عليها زي الأوريو والريسز..
بس صراحة صراحة.. ماقد غامرت وجربت شي بالقرع مدري ما أتخيل كيف الطعم ممكن يكون أحس بتجيني صدمة لسانية هههههههههه.. فقط شيء واحد جربته السنة اللي فاتت كان بالقرع 😇 بمبكن سبيايس لاتيه من ستاربكس << كان لذيذ من جد، لكن هالسنة اشتريت من عندهم بُن بالبمبكن سبايس وصرت أسويه كابتشينو بالبيت ومررره حابته وأستمتع أكثر بشربه وأنا متدفيه على كنبة الصالة واتفرج فيلم 🎃


إذا حصلتوه في أي فرع لستاربكس لا تترددون تجربون تستمتعون فيه بالبيت في جلسة دافية مع اسرتكم 😍


مع دخول موسم الخريف وبرودة الجو المفاجئة ودخول موسم المطر رسميًا في سياتل؛ نلاقي أغلب الشعب لابس جينز طويل وسويترز صوف وجاكيتات جلد ودينم وجزم وجاكيتات ضد المطر بعد ما كانوا متهويين في الصيف 😁.. يعني الكل يدور الدفا سواء بخامة اللبس الثقيلة أو بلونه الغامق اللي يمتص حرارة الشمس.. اوووه عاد مع أسبوع الموضة ونزول تشكيلات الخريف والشتاء يصير السوق مرره يحمس أكثر من أي مره سابقة 😌👌

<<< يعني طلعوا من جد ما يبالغون باليوتيوب ههههههههه

صدق، صرت أشوف التغيير بكل شيء هالفترة.. 💓
الطبيعة الخضراء تتغير، الجو الماطر المتقلب، الأكل والنكهات الجديدة، الفواكه الموسمية، اللبس الثقيل والدافي، الألوان الغامقة والبنيات والبرتقاليات.. فعلًا هو موسم تجدد من كل النواحي حولي، حتى على نفسي كمان!
ذكرى ميلادي في منتصف موسم الخريف، في هاذي الفترة من السنة ما ألجئ للاحتفال بإني كبرت سنة لأني ما أشوف هالشي بحد ذاته مناسبة خرافية تستحق الاحتفال، لكن عادة تكون فترة سرد الإنجازات إيش قدمت وإيش أخرت، التأمل في وضعي وشخصيتي الآن وفي السابق.. إيش تغير فيني وإيش ممكن أغير فيني وإذا أقدر أقوّم نفسي أكثر...!؟
ما أنكر إني سعيدة جدًا بتقدمي في العمر، أحس في كل سنة أصير أكثر نضج وأكثر حكمة وتجارب في الحياة وأكون أقوى على المواجهة والخوض في تجارب جديدة.. وفي هالشهر راح يصير عمري 26 سنة 💚
عشان كذا الخريف هو موسم تغيير حتى على النطاق الشخصي.. 🍁
رؤيتي للخريف هنا غيرت عندي كثير مفاهيم، صار للخريف والربيع مكانة خاصة بقلبي ما راح تكون مرتبطة فقط بالمكان.. 
بآخذها معاية وين ما كنت.. راح أسوي كل شي يحسسني بلذة تغير الفصول حتى لو كنت عايشة في بيئة استوائية 🍂

التغير صار هنا 💓،
 وأتمنى إني حسستكم فيه معايا بهالتدوينة ✨


وفوتتكوا بعافية 🍁💛
____________________

🎀

         
  •          
  •          
  •          
  •          
  •      


6 comments:

  1. ترا موسم المرض هوا بداية الخريف لول ، انا من زمان أعشق الخريف لأنه جو جدة يبدأ يسير حلو و تبدأ طلعات البحر تكثر و الجمعات الحلوة و هذي السنة أول سنة لي أشوف الخريف الحقيقي تجربة مرة حلوة

    ReplyDelete
    Replies
    1. 😂😂😂 شفتي كيف! لمن تنتشر التهابات الجيوب والفلو هذا إعلان دخول الخريف
      تصدقين أبغا أتذكر كيف كان الخريف في جدة بس تماامًا ناسية كيف قضيته.. بس عمومًا ما كنت أعترف كثير بفصول السنة بالسعودية بالسابق.. إن شاء الله تكون تجاربي للخريف هنا فاتحة خير عليا 😆🍁

      Delete
  2. حبيت تدوينتك مرة, سردك التفصيلي ممتع جدا
    ع قولك كنت أسمع بفصل الخريف بس ما قد شفته , ولما سافرت سبحانك ربي كيف ظواهر الخريف تصير قدامك والناس يستعدون له ديكوريا ولبسيا وسوقيا وكلش
    استمري بعطائك

    ReplyDelete
    Replies
    1. الحمدلله فيه أحد زيي ما كان يستوعب الخريف 😂💓
      لكن الحين حتى لو ما حسينا بالخريف بطبيعة جونا؛ لازم احنا نحسس نفسنا بهالأجواء اللذيذة 🍁
      وشكرًا أمل لك وعلى كلامك اللي يجيب السعاادة 🌹

      Delete
  3. جربي البمكن بريد لذذذيذذ هالشي ادمنته من جيت امريكا وخصوصا حق ستاربكس
    اغلب منتجات ستار بكس الخريفيه لذيذة والمتعه في التجربه

    ReplyDelete
    Replies
    1. امممم 😋 اسمها لحاله يشششهي!
      شوقتيني أجربها 😍❣

      Delete

Top