كيف جهزّت لزواجي! 💍 - سواليف

Tuesday, October 10, 2017
بعد مرور سنتين على زواجي، تطلب مني ميعاد أسولف عن جهازي قبل الزواج (هااي ميعاد 😂💗)
حمسني الموضوع كثييرر ههههههههه ذكرني مواقف تضحك! 



امممم جهازي كانت قصته قصة،

أنا بالرياض وراح أتزوج وأسكن في جدة!
كنت حريصة في هاذي الرحلة إني أستمتع فيها قبل كل شي وأنتقي بنفسي كل شيء على ذائقتي بالاستعانة بتجارب أخواتي في التجهيز سواء كانت ناجحة أو فاشلة 😂

كانت خطوبتي قبل زواجي بسنتين، كان عندي وقت مره طويل إني أجهز بترتيب وروقان وبدون حرقة أعصاب..
بدأت الرحلة هاذي بشراء دفتر كنت أكتب فيه كل اللي أحتاج أسويه قبل الزواج / وتجهيزات يوم الزواج / وما بعد الزواج 👰
باسولف عن كل شيء يخص هالتجهيزات، إيش احتجت وإيش ما احتجت وإيش الشغلات اللي تحسفت إني ما سوويتها وهاكزا..بس مدئيًا راح أقول لكم إن السواليف راح تطول 😏💬 << يعني عدلي جلستك أو انسداحتك 😄

أول شيء بدأت أفكر فيه وهي العناية بجسمي، قلت هذا أكثر شيء يحتاج أخطط له من بدري عشان أشوف النتائج على المدى البعيد..
بس لو جينا للصدق ما احتجت إني أسوي أشياء خارقة عن العادة! <<خصوصًا إني مو من فريق خلطات الجسم والسدر والكركم وكذا..
من أول ما دخلت الجامعة وأنا بادية بجلسات ليزر لإزالة الشعر، فما كان محتاج إلّا إني أزود جلسات عشان أتخلص منه نهائيًا.. وباقي عنايتي ببشرتي هي هي ما تغيرت، فقط احتجت أروح لطبيبة جلدية قبل الزواج لأني مع التوتر في التجهيز ولمن قرب الوقت طلع لي حبوب صغيرة بوجهي تحت الجلد.. في البداية لمن كشفتني الدكتورة قالت هاذي طبيعة بشرتك كذا تتحسس وفقط محتاجة غسول معين وكريم ترطيب وكم شغله حلوو.. وفجأة شكلها انتبهت إني لابسة دبلة عاليمين قالت اييه انتي عروصه؟ لأه لأه انتي كدا محتاقه حقات كتيييير.. وفجأة قررت تسوي لي تقشير كريستالي كم جلسة وجلسات نظارة وابر ميزوثيرابي وووو... وأنا كذا 😐 قلت اكتبي لي أسم الغسول والكريم بس << حاولت تقنعني إني عروسة وأحتاج الجلسات اللي قالت عنها بس مرره استفزني كيف غيرت كلامها وصار هدفها مادّي بحت بمجرد ما عرفت إني عروسه! <<< فانتبهي عزيتي العروسة لا يدري عنك لا الخياط ولا الصالون ولا حقت الحمام المغربي ولا الجني الأزرق إنك عروسة لأنهم بيشوفونك عبارة عن مهر متحرك وبيحاولون يستنزفون منك قد ما يقدرون! 😶💔 <<طبعًا هذا مو الموقف الوحيد، صارت لي مواقف فيها استنزاف عيني عينك!
 قد سبق ورحت عند مصمم وقت ما كنت أبغا أفصل للملكة وبالمرة شفت فستان عجبني سألته بكم تفصل لي هذا؟ 
- قال ثلاثة آلاف التفصيل وأنا أجيب االقماش 
- حلووو! طب لو بغيت أختار لون ثاني ممكن تضبطه بنفس الطريقة؟
- يعني شو اللون اللي بدك إياه؟
-أبيض
-  أوووه لا الأبيض بيختلف سعرو.. راح يكون 8 آلاف
- 👀 طب البيج؟ 
- لا البيج الغامق بـ 3آلاف.. بس الفاتح ب8
- طب شكرًا مع السلامة 😠

وفي يوم ملكتي رحت صالون كبير ومعروف بالرياض وطلبت مكياج سهرة سموكي مع رموش وكانت النتيجة حلوووة مره بس كنت على أعصابي لا تغلط وحدة من خواتي وتقول إني بأملّك.. لأنهم راح يجبروني أدفع ضعفين السعر فقط لأني عروسة ملكة رغم إن المكياج نفسه ولا راح يكون فيه أدنى اختلاف 😆
المهم نرجع لموضوع العناية، يفضل لو كنتي تعانين من مشكلة داخلية أو خارجية بجسمك تبدئين بحلها من بدررري ولا تخلينها لأخر اسبوع قبل الزواج عشان ما تتحطمين إذا ما شفتي النتائج، وعشان لو فيه شيء ما ضبط معاك يكون عندك وقت كفاية تعدلينه << تذكرت أختي الكبيرة راحت صالون ليلة زواجها مدري سوت فتلة أو شمع بوجهها وبعدين شقرت حواجبها وكانت طول الوقت تتقرص من مادة التشقير واللي مسوية لها تقنعها إنه عادي عادي طبيعي إلين صار مرره يحرقها وما قدرت تتتحمل وغسلته وتتفاجئ إن بشرتها حول حواجبها احترقت!!! 😶 يعني صار الجلد ذايب يممممه ما أنسى شكله يرروع وعلى طول عالمستشفى حرق من الدرجة الثانية أعطوها مراهم وفهمت الدكتور إن زواجها بكرا ونصحها بفاونديشن طبي أو شي زي كذا << مرره ناسية تفاصيل السالفة 😟 بس اللي أذكره إنها بنفس الوقت راحت عند الكوفيرة اللي نتعامل معاها دائمًا ولمن شافتها اقترحت عليها إنها تقص لها غرة والحمد لله تغطى الحرق وطلعت طلتها تاخذ العقل 😍 
فالمقصد من هالقصة احذري تخلين هالسوالف في آخر لحظة بالذات الشمع وشلته الوقت يكون متهيج ويحتاج وقت عشان يرجع لوضعه السليم.. أما إذا ناوية تشقرين حواجبك بس خايفة إنه يروح بوقت قصير جربي التشقير الكهربائي في العيادات.. أذكر إني كنت أسويه في عيادة بنان في الرياض ب100 ريال بس ويقعد حق شهرين كذا 👌 مره خيار مريح وآمن.

⚠ كمان أنوّه عن أهميّة إتفاقك إنتي وخطيبك قبل الزواج عن تحديد موعد الحمل اللي تكونون مستعدين فيه، لأن قراركم يترتب عليه أمور كثيره وأهمها إنك تزورين طبيبة النساء قبل زواجك بشهر عشان تصرف لك حبوب منع الحمل المناسبة لك أو تعطيك الفيتامينات والمعادن اللي تحتاجينها لو كنتم جاهزين للحمل من الشهور الأولى من الزواج..


أما بالنسبة لتجهيزات الليلة الكبيرة 👰
حاولت أوزع ميزانيتي على الفستان وملحقاته + والكوافيرة والماكييرة + المصورة
طبعًا من قبل الزواج بتسعة شهور بدأت أبحث عن الفستان عند مصممين أو بوتيكات وبكل مكان ممكن يبيع فساتين عرايس.. وللأسف كان السوق كله زي بعض مع إني كنت أبحث عن موديل أوربي ناعم مافيه شيء غريب، أما أسعار الأشياء اللي تعجبني كانت أرقامها فلكية مما اضطرني أغامر وأبحث عن فستاني أونلاين.. والحمدلله لقيت إللي أبغاه بالضبط وكان عندهم في الموقع مقاسات جاهزة وكان فيه خيار إني أحط مقاساتي ويفصلون لي عليها بالضبط.. وتحمست جبت المتر وقمت أقيس بدقة وأعيد القياس كم مرة عشان أتأكد إنه مضبوط تمامًا، ومن ضمن المقاسات إللي كانت مطلوبه هو طولي من راس الكتف إلين الأرض (وكانوا كاتبين إنه لازم تكون حفيانه وانتي تاخذين طولك).. وأنا بذمة وضمير حطيت طولي وأنا حفيانه بدون أي زيادات 😊 << تخيلتم أكيد إيش حصل!
وصلني فستاني بعد ثلاثة شهور وكان مرتتتب ويجنن مررره دخت عنده الصدق إلااااا سالفة الطوول.. تخيلوا الفستان ماسك من فوق إلين عند الحوض ويصير يتوسع بشكل تدريجي، هالموديل يحتاج يكون طويل بزيادة عشان تبان أناقته! بس لمن لبسته مع الكعب صرت لمن أمشي عادي يبان الكعب.. طبعًا بما إن الفستان صار عندي جاهز قبل الزواج بأربع شهور، كنت كل فتره أطلعه اقيسه << لا يكون صار ضيق أو واسع عشان أقدر أعدل عليه بدري.. لأني أوريدي باوديه مشغل يركبون عليه كريستالات سوورفسكي على القطع المشغولة.. بس كنت كل مره أقيسه أطالع في طوله << تعرفون شعور اللي اوكي مو شين بهالطول بالذات انه في ذيل بس بنفس الوقت أتخيل لو بيكون أطول كان بيكون أحسن 😅 فكنت أبثر أمي كل ما قسته إنه شوفي طب شرايك طب اا يعني ما تحسينه مقصرني.. إلخ إلخ إلخ من الحلطمات 😥 طبعًا سالفة إني أطوله مرره مررررررررره صعبة! لأن الفستان من فوق مشغول كله تطريز وشك وبعدين الشغل صاير نازل على تحت بشكل تدريجي، وبطرف الفستان من تحت كمان مشغول يعني كيف بالله بنطوله لازم نجيب نفس القماش بس بعرضين!!
بس قفلت معي إلا باجيب حل.. قلت قصوا الشغل وركبوه على قماش أطول 🤔 طبعًا الفكررة سهلة بالكلام بس كل ما رحت عند مصمم والا مشغل قال ما نقدر نسويه مره صعب وبيخرب الفستان 😭 طب أنا خلاص أقنعت نفسي إنه سهل وقمت أتخيله وهو أطول وانه بيكون جميل ..
ولفلفت كثييييير إلين رضي واحد يسويه بس فيه مشكله صعبة 😦 التل المستخدم هذا تل أمريكي وماهو متوفر في السعودية إلا الوطني والصيني وبعض المحلات يبيعون كوري!!!!!!! << التل الوطني يجي كأنه بلاستيك وفتحاته كبيره وإذا عفطتيه بيدك يتكرمش على طول والصيني قريب منه يعني حق أشغال يدوية مو فساتين، والكوري أفضل شي في السوق وأغلاهم .. بس الأمريكي فتحات التل فيه أصغر وفيه لمعه خفيييفه يشبه الورقنزا وهذا ما قد شفناه هنا *من الآخر* 😐
صراحة كان وقتها عندي مشروع تخرج وتدريب بالمستشفى وفيه أعمال أشتغل عليها وما كان عندي وقت لفرارة محلات الأقمشة، وربي يعطيهم العافية أبويا وأمي هم تكفلوا بهالشي بحكم خبرتهم بهالسوالف، أخذوا عينه من التل حق فستاني وراحوا يجيبون واحد يقرب له.. والحمدلله جابوا نوع يشبهه 💖 ودّوه دايركت للمشغل وسألوني كم تبغين الطول اللي يزيده ومن الحماس أعطيتهم مقاس يوازي ثلاث أشبار 🤕 قالوا متأكده؟ قلت ايييييييييييييييييييييييه هالموديل لازم يكون طويل غير إنه فستان عروسه والكعب اللي أخذته 12 إنش  تقريبا يعني تمامًا متأكده.. ووصل الفستان أخيرًا! ولبسته وكانن يجرجر بس كنت مبسوطه عليه 😂😂 وخلااص دخلته الدولاب وقفلت عليه كيسته وما راح أفتحه إلا قبل الزواج باسبوعين << وسوسة عشان الوزن لا يتغير خخخخ
<<< طبعًا ما أحكيكم وأنا بالزفة يوم دعست الفستان من قدام وباغيت أطيح ههههههههه لازم أتحمل مسؤولية قراراتي وما أتحلطم من طول الفستان 😅
وبالنسبة لطرحة العروسة أخذتها من نفس الموقع مرره ناعمة عبارة عن طبقتين قصيرة إلى نص الظهر تقريبًا وطايحة وبأطرافها دانتيل مطرز وزدت عليها فصوص سوورفسكي بشكل ناعم والحمدلله ارتحت نفسيًا بعدها 👰
طبعًا كوني بالرياض وزواجي في جدة كانت مسألة إختيار المصورة شويتين صعب، لكن مسكت الإنستقرام وسجلت بيانات كل مصورات جدة إللي عجبوني 🙏 وجلست فترة ما بين إتصالات ورسائل واتس اب وايميلات.. وبالحلقة الأخيرة قررت إني أبحث على استيديوهات تصوير بحيث إني أضمن إن عندهم مقر يكون شغل التصوير والطباعة والتغليف فيه والمهم لهم سجل تجاري أقدر أشتكيهم لو صدر منهم أي مخالفة أو ضرر << جهز الدوا قبل الفلعة 😇
واستقريت على استديو لمسات، وأنبت عمتي الله يعافيها عني، راحت وحجزت ودفعت العربون واتفقت معاهم على الباكيج إللي اخترته.. وهنا شطبت على سالفة المصورة 👌
أما الصالون اخترت ملدا إللي بالخالدية عشان شيماء وليد تسوي لي المكياج، وما كان عندي خبره بكوفيرات التسريحات فقلت عادي أي أحد.. بس للأسف كانت غلطة وما راح تتكرر إن شاء الله 😛
وبس والله، كنت مجهزة شنطة لأشيائي اللي بألبسها يوم الزواج، وشنطة للأشياء اللي بآخذها الفندق وشنطة للسفر عشان يسهل علي ترتيب وضعي وكمان يسهل على خواتي اللي يساعدوني ليلتها 🛄💖


أما جهازي ككل من ملابس ومستلزمات بدأ بأخذ تصور كامل بعد حوار مع خطيبي وقتها عن كيف حياتنا بتكون وكيف بيكون روتيننا بالإجمال، وعلى هالأساس قررت أختار الملابس اللي أحتاجها وأكنسل أشياء كثير..
بالنسبة لي كنت بأسكن في بيت أهل زوجي مدة أقل من سنة وبعدها راح نسافر أمريكا، وفي الفترة إللي بأكون فيها بجدة ما كان فيه طاري أي مناسبات إلا زواج ولد عمي (وكنت مقررة ألبس فيه فستان ملكتي اللي كانت بالرياض).. فما كنت أحتاج ملابس نوم وملابس بيت خاصة كثير، ولا أحتاج فساتين كثير، وبشكل عام ما راح أكثر ملابس لأن احتياجي لها قبل ما أروح أمريكا بيكون مختلف تمامًا..
فاللي حصل إني كنت أروح السوق وأشتري الملابس اللي تمثلني باستايلي.. كان فيه كذا قطعة أخذتها للعزايم وكانت تريند وقتها، ولا جت العزايم وراح التريند حقها وتحسفت 🐵 بس بشكل عام أنا أحب القطع البيسك إللي أقدر أركبها مع أي قطعة وتطلع مختلفة، واللي ألبسها وقت طويل ما أحس إنه خلاص انتهى وقتها <<< طبعًا كنت كل ما أرجع من السوق أجي أوري أمي الأشياء اللي أخذتها، ما أنكر إن في بعض الأحيان كان وجهها يتقلب لمن تشوف قرافيك تيشيرت والا لقينق هههههههههه فكنت آخذ من الأشياء اللي فيها موديل وشغل عشان أمي ترضى وعشان خواتي يقولون إيواا كذا خلي لبسك لبس عروسه ههههههههههههه 💕
فيه شغلة كان أبويا يقول لي إياها قبل ما ينزلني السوق هههههههه كان يوصيني لا أكثر ملابس لأن بعد الزواج ما راح أقدر ألبسها كلها <<< ما يبغا يجرحني بس كان يبغا يقول ماراح تدخل فيك بعدين هههههههههههه 😂😂😂 بيني وبينكم كنت مؤمنة بكلامه وهذا اللي كنت أشوفه، حتى أختي اللي أكبر مني يوم بغت تكسر القاعدة وتحافظ على وزنها حملت.. يعني في جميع الحالات حطيت إحتمال زيادة الوزن مع السفر والمطاعم والدلع وماافيه طبخ وكذا 🐼 فاللي حصل إني أخذت كم قطعه أوفر سايزد أو أكبر من مقاسي برقم 😛 << وتراني لبستها في فترة من الفترات وشكرت أبويا في نفسي على هذا الاقتراح!
أما سالفة فساتين المناسبات الكبيرة، طبعًا ما أنكر أهميتها لأنه هو اللبس اللي بتطلعين فيه عند أكبر عدد من الناس بعد زواجك ولازم تكون طلتك تواجه.. بس أذكر أختي أموون اشترت مليون طعش فستان وراحت موديلاتها بدون ما تجي أي مناسبة وقدمت خلاص.. أختي لينه اشترت برضو مليون طعش فستان خصوصًا إن حمولتهم كثيرين وأكيد عندهم مناسبات لو بنقارن وضعها بأمون، بس  إنها زي ما قلت حملت بعد فترة من زواجها ولا قدرت تلبس هذيك الفساتين وبطبيعة الحال ما عاد لبستهم كلهم..
فجيت أنا يعني ينقال لي ذكية وكذا وبأستفيد من خبرات السابقين 😆 قلت ما أعرف أحد بيتزوج بعد زواجي سواء من عائلتي أو عائلة زوجي غير ولد عمي اللي اوريدي محضرة له.. بس من باب الاحتياط أخذت فستان أسود أوف شولدر وبأكمام بوف كنت ميتة عليه، وأخذت فستان لونه فوشي وأبيض حلووو بس مررره مو أنا! ولا ألواني اللي ألبسها بالعادة ولا انلبس حتى هههههه فما أدخله بالحسبة!
اللي حصل بعد زواجي إن عمي سوا عزيمة كبيرة لي فلبست الفستان الأسود، وبعدين عمتي كانت معزومة لحفلة ملكة وكان معاها كرت زايد ورحت معاها وأنا لابسه الفستان الأسود... حلو؟
بعدين فجأة.. بنت خالي انخطبت وحددت ملكتها وكانت كبيرة، واليوم الثاني زواج ولد عمي.. وبعد كم أسبوع زواج بنت عم زوجي وزميلة الطفولة.. وبعدين زواج بنت خالي.. وبعدها بشهر ولد عمي مدري كيف بالرضاعة بيتزوج! يمممممه يممممممممممممه يمممممممممممممممه هههههههه جتني بانيك أتاك! كلها زواجات مهمة مرة! ولازم أطلع على سنقة عشرة! طب ليش كلكم ورا بعض 😭 كان الوقت قصير على إني أفرفر الأسواق فلجئت للأونلاين وطلبت فستان ناعم أسود  <<< الأسود يليق بك 🌚 وقررت ألبس معاه طقم ألماس وأسوي ميك آب وشنيون وبتكون طلتي طلة عروسة على قولتهم ههههههههههه فلبسته في مناسبتين، والمناسبة الأخيرة أمي اشترت لي من الرياض فستان كحلي شيفون ناعم وبرضو اعتمدت على الميك اب والمجوهرات بحيث تكون الإطلاله هادية وإليقنت بنفس الوقت.. ولمن شفت زادت المناسبات قلت ماراح أشتري فستان وأسوي زحمة فيه وأنا باسافر بعد كم شهر فاستعرت فستان زوجة أخويا << برضو كان الفستان أسود هههههههه *حب كبير للأسود* بس موديله مختلف عن اللي لبستهم من قبل كان قماشه ثقيل ومنفوش ومن فوق ماسك أوف شولدر مع قصة صدر مفتوحه.. فالحمدلله يااااااررب خلصت هذيك السنة على خير ومن بعدها ما صارت ولا نص مناسبة هههههه << ليتهم وزعوا شويا كان خلوا مناسبة بعد ما أرجع أمريكا وقت ما كنت متعطشة لمناسبات 😹
طبعًا بما إنه إقامتي في جدة كانت تعتبر مؤقته وبعدها راح أنقل فما كنت حابة فكرة إني أسافر ب8738 شنطة، فحرصت آخذ أكثر شي ممكن أحلله وأستفيد منه في عدة إطلالات سواء بالملابس أو حتى الجزم والشنط.. اعتمد في الجزم على النيود والأسود ودخلت صندل كعب ربط أحمر عشان أكسر الألوان في بعض الإطلالات، والشنط كانت صدفة كلها بيج ونيود ههههههه وللمناسبات أخذت كلتش أسود وواحد نيود << بس ما أوصف لكم إيش كثر حللتهم صدددق سواء كعوب أو صنادل أو فلاتات كانت بدرجات البيج والنيود والجملي يعني تنلببس مع كل شي حرفيًا! 🐪💛
وبما إنّي إنسانة ما تهتم بتنوع العبايات كثير فاكتفيت بثنتين وحدة بتطريز أسود للاستعمالات اليومية، ووحدة فيها شغل وشك للمناسبات.. وبعد فترة من زواجي احتجت أغير واشتريت عباية جديدة من الرياض << يعني الدعوة سهالات وزي ما كنت أقول لنفسي "ترا السوق ما بيطير"!

أما الإكسسوارات ما أخذت منهم شي، لأني ببساطة ما أحبهم 😿 بطبعي أحب يكون عندي سوارة ناعمة وخاتم أو خاتمين بيدي وألبسهم بشكل يومي، فالاكسسوار أبدًا ما يعيش معايا إيش ما كانت البراند.. فاتجهت لسوق الذهب بطيبة وأخذت خاتم ودبلة باند عريضة يومية وسوارة سلسال ناعمة تنلبس مع الساعة.. وباقي الميزانية حطيته في أطقم ذهب وأطواق 💖💖
مع الشبكة جتني عطوور مرره كثيرة وكل واحد أجمممل من الثاني ما احتجت أشتري زيادة إلى عطور للجسم أخذتها من فيكتوريا سيكرت، اشترت أطقم اللي تجي معاها لوشن معطر مرره أحبها، أما عطور للمفارش وفواحات وبخور وعود كانت متنوعة من الماجد وزهور الريف والعود كان من نخبة العود..
عندي من قبل استشوار مرره أحبه وعندي استريتنر من جوسي ايبر فما احتجت إني أشتري جديد إلا الكيرل آيرون << لظاني كنت أستخدم مع خواتي ومستغنيه.. وبرضو أخذته من جوسي ايبر << حب كبير لجودة هذا البراند 💗
امممم إيش كماان! 👀 المكياج حقي أخذت منه الجديد والنظيف واللي أحبه، واشتريت المنتجات اللي أستخدمها في الغالب بدون تجميع مكياج بكل الألوان وكل الدرجات وبالأخير يقعد منظر وياخذ مكان على غير سنع << انتبهي أحد يقنعك تاخذين أشياء إنتي ما راح تستخدمينها.. احذري من فكرة إنك تاخذين شنطة مكياج كاملة بكل محتوياتها من براند رخيصة عشان يطلع كأنك شارية كثير ومتكلفة وانتي ما تحتاجين ولا نصهم وتروح فلوسك على منتجات بجودة رديئة / حطي فلوسك بمنتجات محددة متأكدة إنك بتستهلكينها ويكون عليها تقييم وتجارب عالية وتسوى فيها كل هللة.. <<< أذكر يوم كنت أشوف تجهيزات البنات في أقلاع بالمواضيع القديمة كان الكثير يركزون على إن يكون عندهم أشياء كثيرة تدخل فيهم البيت، بعيد عن نظرة الناس إنه والله جهازها يواجه أو لا.. حطي في بالك إنك من هالمرحلة لازم تتعلمين تكونين إنسانة ذات مبادئ وأفكار مستقلة لأنك راح تنشئين أسرة خاصة فيك إنتي وزوجك وحدكم ولا تسمحون بآراء إنتم غير مقتنعين فيها تمشي عليكم على أساس انتم صغار وما عندكم تجارب..

بأختم سالفتي الطويلة هاذي بنصيحة على طاري التجارب..
سواء كنتي آنسة أو مخطوبة أو متزوجة، حطي في بالك إن الزواج هو إنشاء أسرة جديدة، هو شراكة زوجين، افهموا وتعرفوا على بعض أكثر بدون أحكام، افتحوا قلوبكم لبعض وسولفوا مع بعض بأريحية وكونوا أصدقاء بعض..
خلوا تجربتكم خاصة فيكم واستمتعوا بخوضها سوا ولا تسمحون لأنفسكم إنكم تسمعون آراء ونصائح الآخرين في علاقتكم <<< بالذات إذا كانت اللي تتكلم نموذج غير جيد في حياتها الزوجية! *يااااا كثرهم كثراااه*
انتي تعرفين زوجك أكثر من ما صديقتك أو أختك تعرفه، لا تسمحين بتجاربهم الخاصة أو بالأحكام العامة عن الذكور إنها تأثر على نظرتك لزوجك.. أدري كل العلاقات فيها ارتفاعات وانخفاضات كمان، احذري في لحظة ضحف تروحين لأحد تشتكين له من زوجك وتخرّين الأكو والماكو حتى لو كانت أمك، تذكري في اللحظة اللي تفكرين تشتكين لأحد فيها عن زوجك إنهم بياخذون أحد الفكرتين.. يا إمّا إنهم بياخذون فكرة سيئة عن زوجك وراح تأثر على نظرتهم لك ولحياتك في المقابل، أو إنهم بيحاولون يعطونك نصايح قد تكونين في غنها عنها لو إنك رحتي شكيتي لربك ودعيتيه ورجعتي عند زوجك تساوون الخلاف وتحلون مشاكلكم بعقلانية..
وامممم بأقول شي بس 😏
 ترا دائمًا اللحظات اللي تجي بعد الزعل هي أحلى الأوقات وأجملها في العلاقة الزوجية.. فحاولي ما يطول بينكم الزعل ولا تخلين سالفة الكرامة تعمي عيونك عن الأشياء الجميلة اللي بينكم 💝

<<< أوف كيف شطحت بالموضوع! هههههههههههههههههه قاعدة أعطيكم درر الكلام
 يللا يلااا...



فوتتكوا بعافية 👰💍
____________________

🎀

        
  •        
  •        
  •        
  •        
  •     





2 comments:

  1. نصائحك ياروان مرا جميلة وحبيتها
    حبيت هروجك وبساطتك
    ومنجد أتفق معاك في آخر نقطة مع أني مو متزوجة بس دايماً أقول هذا الشئ
    مهما صار بينك وبين زوجك لا يخرج من بينكم
    ولا تقارني زوجك بزوج أختك واالإ صحبتك
    لأنه كل رجال يختلف عن الثاني
    إذا الأخوان ما يتشابهوا فكيف بالرجال

    ويعطيكِ العافية ي جميلة على التدوينة المفيدة

    ReplyDelete
    Replies
    1. يسلمك ربي على هالكلام الحلو 💝
      فعلًا، وللأسف كثير من البنات يجهلون هالأمور.. إمّا إنها تتحمس للزواج من بعد ما تشوف تجربة بنظرها سعيدة
      أو تعزف عن الزواج لمن تشوف تجربة حولها سيئة..
      لازم كل بنت تكون مسؤولة عن قراراتها وتصرفاتها واختياراتها وحتى طريقة تعاملاتها

      Delete

Top