كيف تستفيدين من موقع دروب: تفاصيل الدورات المجانية 💻

Friday, March 3, 2017

السلام عليكم والرحمة 💕
،
بعد ما تخرجت من الجامعة، كان عندي الوقت الكافي إللي أقضيه مع نفسي.. 
عرفت خلال هالفترة إني أبغا أتعلم زيادة، مو بس لغة إنجليزية وترجمة! أبغا أتوسع أبغا أعرف شيء من كل شيء 👓
<< عمومًا كذا شخصيتي أحب أكون مدرّكة في كل شي 😃
بالإضافة إلى إنه مجال التدوين أعطاني دفعة حماسية أتعلم أكثر عن الفوتوشوب والرسم الرقمي وخلاني غصب أطور نفسي بالتصوير والكتابة وكمان كيف أكتب أو أتواصل مع جمهور.. كنت متحمسة أغذي عقلي بمواضيع مختلفة
<< ما ندري! ممكن ألاقي شغفي في مجال ما كنت أتصوره من قبل!
فبدأت بالتعليم الذاتي، أقرا مقالات، تدوينات، أحضر دورات عاليوتيوب وأحوس هنا وهناك..
إلين بالصدفة في رمضان 2016 طحت على موقع دروب << قريت عنه في أحد القروبات العشوائية عندي بالواتس اب
دخلت وسجلت، ما كنت فاهمته كويس << وعموما ما كنت أعرف أنظم وقتي في رمضان 😅
تحديدًا، لمن جيت أمريكا وصار عندي وقت أكبر متاح لنفسي حطيت خطة تطويرية لنفسي 👏🏆
كانت بدايتها موقع دروب



بدايةً،
موقع دروب هو موقع أطلقه صندوق الموارد البشرية، يحتوي على الكثييير من الدورات التطويرية المجانية في مجال الأعمال،
يتميز الموقع -من تجربتي- بتنوع الدورات وتنوع وسائل طرحها، يعني في الدورة الوحدة بتلاقي مقاطع فيديو ونصوص للقراءة وألعاب وأسئلة وغيرها.. هالشيء جدًا بطل لأنه يبعد عنك الملل ويثبت المعلومة بطرق إبداعية سواء كنتي سمعية أو بصرية أو حتى حسية في تلقّي المعلومات 👍
الميزة الثانية اللي حبيتها.. إن الدورات تكون مسجلة (غير مباشرة)، يعني مافيه وقت معين ترتبطين فيه! متى ما حصل لك وقت فراغ أدخلي على صفحتك وبتلاقين فيها آخر جزئية وقفتي عندها المرة اللي فاتت <<فيه أحلى؟! 😍
الميزة الثالثة، شهاداتها مدعومة من صندوق الموارد البشرية (هدف)، كمان معتمدة من قبل المقاييس السعودية للمهارات.
صحيح إن الدورة مجانية وشهادتها معتمدة لكن حصولك على الشهادة مرتبط باجتيازك للاختبار 💪
يعني لازم يكون هدفك إنك تتعلمين فعلًا لأنك لو قعدتي تسلكين بس عشان تحصلين هالشهادة ما بتقدرين 😁 فخليك جادة في الموضوع 🌞

www.doroob.com


للإستفادة من خدمات دروب التدريبية عليكِ التسجيل في الموقع
عبر الضغط على زر "التسجيل" في أعلى الصفحة


مهم جدًا ملئ الخانات ببيانات صحيحة عشان تجيك رسالة تأكيد وتتم أمورك بسلاسة 😉
بعد ما تصيرين مسجلة رسميًا وأمورك تمام؛ ترجعين لنفس الصفحة الرئيسية وتضغطين على زر "تسجيل الدخول"
في أعلى الصفحة عاليسار.


تحطين إيميلك والباسوورد وتحطين دخول..
لكن إذا انتي من مستخدمين طاقات (عندك حساب حافز بمعنى آخر) راح يقول لك إنه انتي من مستخدمي طاقات وبيفتح لك موقع طاقات عشان تسجلين فيه ببياناتك وبيفتح لك أوتوماتيك << ااه يا أيام حافز ههههه

طيب، بعد ما تدخلين الموقع بتلاقين كل شي واضح فيه، بامكانك استعراض الدورات الموجودة فيه عن طريق الضغط على زر "التعليم الإلكتروني" مثل ماهو موضح في الصورة تحت..
(على فكرة! تقدرين تسجلين في أكثر من دورة بنفس الوقت بس أهم شي رتبي وقتك) 👍


إذا لفت نظرك عنوان دورة معينة تقدرين تضغطين على الصورة وبتفتح لك صفحة فيها معلومات مفصلة عن الدورة وإيش فايدتها وإيش اللي ممكن تتعلمين منها..


بعدها تضغطين على زر "سجل في الدورة"


وزي ما قلت سابقًا تقدرين تسجلين في أكثر من دورة..
وكل ما بغيتي تاخذين درس ترجعين للصفحة الرئيسية وتضغطين على زر "الدورات المسجل بها"


بتطلع لك قائمة الدورات اللي سجلتيها، وةعشان تبدئين في الدورة بتلاقين قدام كل دورة بتلاقين زر أخضر مكتوب عليه "بدء" بيدخلك على الدروس..


تضغطين على زر "محتويات المساق" عشان تفتح لك الدروس..
بتكون على شكل قائمة على اليمين.

<< الدورة اللي اخترتها حاليًا قصيرة جدًا على غير العادة يعني لا تنصدمون إذا لقيتم دورة فيها 10 أسابيع كلها يعتمد على حسب المحتوى 😅


تبدئين بالخانة الأولى بالضغط عليها والتركيز في المعلومات المعطاه فيها ولمن تخلصين من كل جزئية في الدرس الأول عليك تضغطين على السهم الأيسر اللي في الشريط فوق الدرس << وبتلاقين برضو سهمين تحت الدرس وكل ما خلصتي جزئية اضغطي على السهم الأيسر إلين ما يصير رمادي *زي ماهو موضع بالصورة اللي تحت*..
وإذا كنتي شابكة خط مع الدرس ما يمنع إنك تنتقلين للدرس إللي بعده وهكذا 😍


خلال الدورة بتلاقين أسئلة ونشاطات حليّها كويس لأنه عليها درجات! 😎
درجاتك ومدى تقدمك مرصودة في صفحة مستقله  بتلاقينها لمن تضغطين على زر "الإنجاز"..

<< بس أوريكم درجاتي وإني دافورة وكذا 💃


تقدرين تاخذين الدروس متى ما بغيتي بس ترا لا تفلّينها وتاخذين وقت طويل مررره بين الدروس لأنه هالشيء مو في صالحك وبتنسين الدروس السابقة.

إذا خلصتي أول دورة لك راح يوصلك عالإيميل طلب كتابة إسمك بالإنجليزي عشان توصلك الشهادة، وبس خلاص يصير كل ما خلصتي دوره واختبرتيها بتوصلك الشهادة على إيميلك بعد فترة 😍👍


<< كان نفسي إن شهادة الدورة هاذي توصلني بدري وأنزلها، لكن حطيت مثال لشهادة أخذتها سابقًا..
بتوصل لايميلك على شكل ملف PDF


أهم شي لا تنسين تحطين هالمعلومة في السي في حقك وتحفظين نسخة إلكترونية ونسخة ورقية من الشهادة عشان إذا احتجتيها مستقبلًا.. وتستفيدين واقعيًا من المعلومات اللي تعلمتيها في حياتك أيّ كانت 🏆

إللي قد سبق وأخذوا دورات في موقع دروب شاركونا الدورات اللي أخذتوها في خانة التعليقات عشان نستفيد 😍💟


أتمنى لكم بالأخير قضاء وقت ممتع✨

وفوتتكوا بعاافية 💦🐋

_______________________


   

 📧 بريد إلكتروني
 RawansBlog.M@gmail.com

🎀

26 comments:

  1. الموقع بس ناقصة ابلكيشن 😩👌🏽

    ReplyDelete
    Replies
    1. بالعكس أشوفها ميزه إنه بس ديسك توب بالنسبة لي، لأني آخذ اللاب توب واقعد في مكان مرتب هالبروتوكولات تعطيك جو من الجديه للموضوع..
      لكن بإمكانك تفتحينه من الجوال أو التابليت يؤدي الغرض 😍👍

      Delete
  2. حاولت أكثر من مره بس ما ادري إيش اللي منعني ، رغم اني أخذت دورات أونلاين من مواقع غير معتمدة مثله. يمكن خايفه يكون طووويل مره و ممل و ما اقدر اكمله !

    ReplyDelete
    Replies
    1. الموقع فيه دورات من مختلف المجالات وميزتها إن دروسها تحتوي على فيديو + صور + قراءة + ألعاب + نقاشات.. يعني متنوعة جدًا، بس ادخلي بحماس وعزم وخلي هدفك التعلم صدق وما بتحسين بالملل 😁
      الدورات تختلف حسب المحتوى، فيه بعضها الطويل وبعضها المتوسط وغيرها القصير.. يعني زي الدورة إللي سجلت فيها عشان أحطها كمثال مدتها اسبوع لكن خلصتها في يومين فقط! كانت ممتعة واستفدت منها كثير في التعامل في محيط العمل..

      لكن نقطة أخيرة حابة أنبهك عليها..
      الموقع مدعوم من الحكومة وشهاداته معتمدة، تقدرين تتطلعين على (شركاء النجاح) في موقع دروب 👍😍

      Delete
  3. أول مرا اسمع في الموقع مرا جميل 😍 و الحلو انه فيه شهادة راح اسجل فيه ان شاء الله بما اني فاضية ، يعطيك العافية 💞

    ReplyDelete
    Replies
    1. جدًا جمميل وباذن الله راح يفيدك 😍💕

      Delete
  4. هل لازم اختبر للدورة ؟ لان قريت ان فيه تسجيل للاختبار وحوسة!

    ReplyDelete
    Replies
    1. مهم اختبار الدورة، لكنها ما تحتاج تسجيل أو غيره، راح تلاقين الاختبار فورًا بعد آخر درس من الدورة

      Delete
  5. مشكورة روان على الشرح الوافي .. الله يعطيك العافية

    ReplyDelete
  6. ماشاء الله عليك روان كفيتي ووفيتي بالشرح انا كاتبه بقوقل عن دروب ودخلني هنا ياحلوها من صدفه والله انا سجلت بدروب وكمان المخيم الصيفي اللي تبع دروب بصراحه مجهود يشكرون عليه والاهم انه معترف فيه عندنا ويشغل وقتنا بالإجازه ...

    ReplyDelete
    Replies
    1. ربي يسعدك غادة 🌷
      فعلًا والله الإجازة طوولت ههههههه أنا حاليًا جالسة أشوف دورات جديدة كمان تشغل وقتي 💕
      أتمنى لك وقت مثمر ~

      Delete
  7. يعطيكي العافيية لقيت كل المعلومات الي احتاجها
    مشطورة حبيبتي

    ReplyDelete
    Replies
    1. ربي يعافيك شيماء 💕

      Delete
  8. هل الشهادة توصل على طول؟ لأن أنا ما وصلني شيء.
    ومره شكراً الله يجعل اللي تسوينه في ميزان حسناتك

    ReplyDelete
    Replies
    1. أعطيهم ثلاث أيام إذا ما وصلتك الشهادة عالإيميل تواصلي معاهم عالتويتر أو أرسلي لهم إيميل قد يكون فيه خلل فني أحيانًا أو إنك دخلتي بريدك غلط..
      وربي ييسر لك أمورك دلو 💜

      Delete
  9. سمعت انو في اختبارات لازم اخضع لها في المراكز الاختبارات وهل الشهاده غير عن الشهاده اللي حصلت عليها في بعد ما خلصت الدوره ؟

    ReplyDelete
    Replies
    1. معلومة أول مرة أسمع فيها لكن ما أعتقد إنها صحيحة، لأنه إذا كان الإختبار بهالطريقة فماراح يستفيد أحد منه إلا سكان المدينة اللي يقام فيها الإختبار وهذا مو من رؤية الموقع أو أهدافه.. الدورات لكل الأشخاص متاحة عن بعد

      Delete
    2. ايوا صح فكرت كدا برضو بس ما اعرف الناس يتكلمو عن اخبارات دروب بالمراكز ولمن فتحت التويتر يقولو سيعلن عنها قريبا ولمن تواصلت معاهم قالو ليست متاحه حاليا ماني فاهمتهم صراحه ..
      اخذت اكثر من 3 دورات وحصلت على خطاب اتمام الدوره ؟ يكفي الخطاب لحالو؟ّّ

      Delete
    3. اممم غريب الصدق! 👀
      بالنسبة للخطاب هو يعتبر شهادتك اللي تثبت إنك اجتزتي الدورة 👍

      Delete
  10. جميل ياروان انا استخدم الموقع شبه يوميا حالياَ لاني فاضيه جداّ.
    ف مع ان عندي خلفيه لكن عجبني موضوعك وتنسيقك له وحبك لنشر الخير وفرصه سعيده اني عرفت انسانه مثقفه وبإذن الله من متابعاتك

    ReplyDelete
    Replies
    1. ربي يسعدك على هالكلام الحلوو ❣
      جميل هالموقع بالذات بأوقات الفراغ يحسسك بالإنجازية في يومك 💭💕

      Delete
    2. حتى انا قريت ان فيه اختباىات بمراكز قياس والي يوصلمم بعد الظوره هو خطاب اتمام دورة لكن الي في قياس هو شهادة ... عموما اشوف اختبار المركز افضل ويعطي قوة للشهاده لان الي عن بهد كثير يعتمدون على حسابات الانستقرام تحل لهم وتعكيهم فلوس فتروح المصداقيه

      Delete
    3. غريبة! أول مره أسمع بهالشي..
      لكن لو فعلًا هالكلام معناته إنه سكان المحافظات والمدن ما راح يقددرون يستفيدون من دروب وهالشي ينافي رؤيتهم!

      يبغالي أتواصل معاهم أتأكد من المعلومة

      Delete
  11. ما احب القراءة جاني نعاس :( منه, وما عرفت كيف الغي الاشتراك فالتدريب ؟

    ReplyDelete
    Replies
    1. وقفي التدريب ومتى ما صرتي رايقه كمليه.. خذيها على مهلك 😂
      فيه دورات كثير تكون يكون عرض محتواها عن طرريق فيديوات.. شوفي اللي يناسبك

      Delete

Top